Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ ու ՀՀ Կրթության և գիտության նախարար Արմեն Աշոտյանի աջակցությամբ, Մայր Աթոռ Սուրբ Էջմիածնի Քրիստոնեական դաստիարակության կենտրոնը և Հայաստանի Աստվածաշնչային ընկերությունը 2015 թ. հոկտեմբերի 22-ից սկսյալ իրականացրեցին «Աստվածաշունչ դպրոցներին» ծրագրի առաջին փուլը:

Ծրագրի շրջանակներում տեղի ունեցան հանդիպումներ Սյունիքի, Վայոց Ձորի, Կոտայքի, Արմավիրի, Տավուշի, Շիրակի մարզերի հանրակրթական դպրոցների «Հայոց Եկեղեցու պատմություն» առարկա դասավանդող շուրջ 1000 ուսուցիչների հետ: 
Այդ առիթով նրանց ընծայվեցին Աստվածաշունչ մատյաններ:

Նոյեմբերի 25-ին ՔԴԿ տնօրեն Գերաշնորհ Տ. Վարդան եպիսկոպոս Նավասարդյանն ու Հայաստանի Աստվածաշնչային ընկերության ծրագրերի պատասխանատու Արշավիր Գաբուջյանն առաջին փուլի ամփոփման կապակցությամբ հանդիպում ունեցան ՀՀ Կրթության և գիտության նախարար Արմեն Աշոտյանի հետ: 
Զրույցի ընթացքում անդրադարձ կատարվեց ծրագրի արդյունավետությանը, հաջող ընթացքին, ինչպես նաև նշվեց, որ ծրագիրը մեծ խանդավառություն է առաջացրել մասնակից ուսուցիչների շրջանակներում:
Ծրագրի երկրորդ փուլի իրականացումը նախատեսվում է 2016 թ. գարնանը:

Ավարտվեց «Աստվածաշունչ դպրոցներին» ծրագրի առաջին փուլը


Նոյեմբերի 26-ին, ժամը 15:00-ին «Տիգրան Մեծ» Բարեգործական Հիմնադրամի նախագահ, Սրապիոն Գևորգյանի նախաձեռնությամբ, Եղիշե Չարենցի անվան, Գրականության և արվեստի թանգարանում (հասցեն` ք. Երևան, Արամի 1) կմեկնարկի «Ո՜չ ահաբեկչությանը» խորագիրը կրող դասական երաժշտության համերգը:

Հանդիսության մասնակիցները 1 րոպե լռությամբ կհարգեն, ահաբեկչություններից տուժած, բոլոր անմեղ զոհերի հիշատակը:

Միջոցառման ընթացքում, իր կատարումներով հանդես կգա, միջազգային մրցույթների դափնեկիր, օպերային մեներգչուհի Մերի Մովսիսիյանը` միջազգային միցույթի դափնեկիր, երգահան, դաշնակահար Արմինե Հարությունյանի նվագակցությամբ:
Մուտքն` ազատ է:


«Տիգրան Մեծ» Բարեգործական Հիմնադրամ

Նոյեմբերի 26-ին, Երևանում կկայանա «Ո՜չ ահաբեկչությանը» դասական երաժշտության համերգը

Պաշտոնական այցով Սանկտ Պետերբուրգում գտնվող Երևանի քաղաքապետ Տարոն Մարգարյանը ՌԴ հյուսիսային մայրաքաղաքի նահանգապետ Գեորգի Պոլտավչենկոյի հետ միասին մասնակցել է հայ ազգային դասական երաժշտական դպրոցի հիմնադիր, մեծ երգահան Կոմիտաս վարդապետի հուշարձանի հանդիսավոր բացման արարողությանը: Միջոցառմանը ներկա են գտնվել նաև ՌԴ-ում ՀՀ արտակարգ և լիազոր դեսպան Օլեգ Եսայանը, Սանկտ Պետերբուրգում Հայաստանի գլխավոր հյուպատոս Հրայր Կարապետյանը և Երևանի քաղաքապետարանի ներկայացուցչության ղեկավար Արմենակ Կարապետյանը, տեղի հայ համայնքի ներկայացուցիչներ, բազմաթիվ պետերբուրգցիներ:

Մինչ հուշարձանի բացումը նահանգապետ Գեորգի Պոլտավչենկոն ողջույնի իր խոսքում, կարևորելով հայ-ռուսական դարավոր բարեկամությունը, նկատել է, որ Սանկտ Պետերբուրգում հուշարձանի կանգնեցումը երկու ժողովուրդների անխախտ բարեկամության ևս մեկ վկայությունն է` հատկապես հաշվի առնելով այն հանգամանքը, թե հայերի համար ինչ դեր ու նշանակություն ունի Կոմիտաս վարդապետի անձը:
«Ամենևին էլ պատահական չէ, որ Կոմիտաս վարդապետի հուշարձանը կանգնեցվում է հենց Վասիլեօստրովսկի վարչական շրջանում, քանի որ հենց այս շրջանում են ի սկզբանե բնակություն հաստատել ու այսօր էլ մեծ թվով հայեր են ապրում: Մշակութային կենտրոն համարվող Սանկտ Պետերբուրգում աշխարհահռչակ երգահանի հուշարձանի տեղադրումը նաև օրինաչափ է: Կոմիտասը հայ ժողովրդի հանճարեղ զավակն է՝ մարդ, ով աշխարհի բազմաթիվ երկրներում քարոզել և փառքով է պսակել հայկական երաժշտությունը: Նրա մշակույթը գերել էր աշխարհի շատ ու շատ երաժիշտների»,- նշել է Գեորգի Պոլտավչենկոն: 

Ողջույնի իր խոսքում ՌԴ-ում ՀՀ արտակարգ և լիազոր դեսպան Օլեգ Եսայանն իր հերթին նախ շնորհակալություն է հայտնել Սանկտ Պետերբուրգի կառավարությանը՝ մեծն Կոմիտասի հուշարձանը ՌԴ հյուսիսային մայրաքաղաքում կանգնեցնելու հարցում ցուցաբերած մեծ պատրաստակամության համար՝ նկատելով, որ այն իրոք երկու ժողովուրդների բարեկամության ևս մեկ լավագույն խորհրդանշումն է:
«Պարոն նահանգապետի դիտարկումն իսկապես տեղին է, Կոմիտասը համաշխարհային մեծություն է, և նրա արվեստը սահմաններ չի ճանաչում: Սա երկու ժողովուրդների դարավոր ու եղբայրական բարեկամության ևս մեկ վկայությունն է, որն այսօր էլ ամուր հիմքերի վրա է», - նշել է Օլեգ Եսայանը:

Ողջույնի խոսքով հանդես է եկել նաև Երևանի գլխավոր ճարտարապետ Տիգրան Բարսեղյանը, ով ի դեմս Երևանի քաղաքապետ Տարոն Մարգարյանի և Սանկտ Պետերբուրգի նահանգապետ Գեորգի Պոլտավչենկոյի, առանձնակի շնորհակալություն է հայտնել երկու քաղաքների բոլոր այն պատասխանատուներին, որոնց ջանքերով կյանքի է կոչվել հուշարձանի ստեղծման ու այն ՌԴ հյուսիսային մայրաքաղաքում կանգնեցնելու գաղափարը:

«Եվ հատկանշական է, որ Հայաստանը խորհրդանշող Մեծ հանճարին նվիրված հուշարձանի բացման արարողությունը տեղի է ունենում Հայոց ցեղասպանության 100-ամյա տարելիցի շրջանակում: Այն երախտիք է կոմպոզիտոր, ազգագրագետ, գիտնական, խմբավար, երգիչ, մանկավարժ, հրապարակախոս, բանաստեղծ, հայ դասական երաժշտության, ազգային կոմպոզիտորական դպրոցի հիմնադրին, ում անձը հայ ժողովուրդը նույնականացանում է հայոց այբուբենը ստեղծած Սբ Մաշտոցի հետ՝ երաժշտության ասպարեզում: Մեծն Կոմիտասի արժևորմանը միտված բազմաթիվ հոգևոր ու նյութական արժեքներ են ստեղծվել աշխարհում՝ գիտական, երաժշտական միջավայրում, հատկապես աշխարհի հայաշունչ հատվածներում: Աշխարհի տարբեր երկրներում տեղադրված նրա արձաններն ու կիսանդրիները վկայում են, որ Կոմիտասը միայն հայկական արժեք չէ: Նա համաշխարհային է, միջազգային ու համամարդկային: Ու կարծում եմ՝ սխալված չեմ լինի, եթե ասեմ, որ այս գողտրիկ պուրակում, մասնագիտական խոր նրբազգացությամբ կերտված Կոմիտաս վարդապետի այս հուշարձանով մշակութային այնպիսի հարուստ քաղաքը, ինչպիսին Սանկտ Պետերբուրգն է, այսօր հարստացավ ևս մեկ արժեքավոր ստեղծագործությամբ՝ առավել ջերմացնելով և սերունդներին փոխանցելով հայ և ռուս ժողովուրդների անխախտ բարեկամությունը», - նշել է Տիգրան Բարսեղյանը:

Վասիլեօստրովսկի վարչական շրջանի կենտրոնական Կամսկի այգում Երևանի և Սանկտ Պետերբուրգի համագործակցության շրջանակում կանգնեցված հուշարձանի բացման պատիվը վերապահվել է Երևանի քաղաքապետ Տարոն Մարգարյանին և Սանկտ Պետերբուրգի նահանգապետ Գեորգի Պոլտավչենկոյին, որն ուղեկցվել է աշխարհահռչակ դուդուկահար Ջիվան Գասպարյանի կենդանի նվագակցությամբ: Այնուհետ Հայ Առաքելական և Ռուս Ուղղափառ եկեղեցիների սպասավորները համատեղ կատարել են Կոմիտաս վարդապետի հուշարձանի օրհնության կարգ:Միջոցառման մասնակիցները ծաղիկներ են խոնարհել հուշարձանին:
Կոմիտաս վարդապետի 3,3 մետր բարձրությամբ և 1,7 մետր պատվանդանով գրանիտե հուշարձանի հեղինակը Ռուսաստանի նկարիչների միության անդամ, Սանկտ Պետերբուրգի գեղարվեստաարդյունաբերական ակադեմիայի դոցենտ Լևոն Բեյբությանն է, ճարտարապետը՝ Մաքսիմ Աթայանցը:

Այսօր Սանկտ Պետերբուրգում բացվեց Կոմիտաս վարդապետի հուշարձանը

Մուղդուսյան արվեստի կենտրոնը հաղորդագրություն է տարածել, որում ասվում է.
«Մեկ տարի առաջ Մուղդուսյան արվեստի կենտրոնը սկսեց նկարչության և կավագործության դասընթացներ` նախատեսված տարբեր տարիքային երեխաների համար: 
Քանի որ մեր նպատակն էր հավասար հնարավորությունների միջավայր ստեղծել երեխաների համար, ի սկզբանե խոցելի խմբի երեխաների համար դասընթացներն անցկացվեցին անվճար: Իսկ վճարունակ երեխաների ծնողների նվիրատվություններով գնում ենք իրենց երեխաների ներկերը: Գումար ավելանալու դեպքում` գնում ենք ներկեր նաև ոչ վճարունակ ընտանիքների երեխաների համար:
Այսպիսով, մեր կենտրոն հաճախող երեխաներից 15-ի ծնողները չեն վճարում դասընթացների, այդ թվում՝ ներկերի համար: Մեզ համար չափազանց կարևոր է լուծել նաև այս երեխաների սոցիալական խնդիրը, ինչը հույս ունենք իրականացնել՝ նրանց մասնագիտական կրթություն տալով: Այս առումով կավագործության լիարժեք դասընթացը կարող էր իսկապես օգտակար լինել, սակայն այս դասերն իրականացնելու համար չունեինք բրուտանիվ: 
Ի ուրախություն մեզ, կենտրոնին արդեն նվիրել են կավի վառարան, որտեղ մինչ այժմ թրծվել են երեխաների կավե աշխատանքները: Սակայն կավագործության դասերը լիարժեք կազմակերպելու համար անհրաժեշտ էր նաև բրուտագործական չարխ՝ 250.000 դրամ արժողությամբ: Ծրագիրն իրականացնելու և անհրաժեշտ գումարը հավաքագրելու համար կենտրոնը դիմեց ԿՈՂԲ կրթության, մշակույթի և սպորտի զարգացման հիմնադրամին, որի առաքելությունն է կրթամշակութային ծրագրերի և առցանց հարթակի միջոցով աջակցել պատանիներին և երիտասարդներին՝ հասնելու իրենց կրթական նպատակներին:
Հավանության արժանանալով հիմնադրամի Խորհրդի կողմից՝ նախագիծը տեղադրվեց հիմնադրամիkoghb.com կայքում, որը ֆինանսավորման համընդհանուր հարթակ է և հնարավորություն է տալիս անհատներին և կազմակերպություններին առցանց ստանալ և տրամադրել ֆինանսական և այլ աջակցություն՝ կրթամշակութային նախագծերի կյանքի կոչման նպատակով:
Շուրջ երեք ամիս տևած առցանց դրամահավաքի արդյունքում հավաքվեց բրուտանիվի ձեռք բերմանան հրաժեշտ գումարը: Բրուտանիվ պատրաստող վարպետը նույնպես զիջեց գումարի մի մասը։ Համատեղ ջանքերի շնորհիվ այժմ երեխաները կկարողանան նաև բրուտագործությանհմտություններ ձեռք բերել:
Ավելացնենք, որ Մուղդուսյան արվեստի կենտրոնը չունի ֆինանասավորում, մեր մասնագետները չեն վարձատրվում, իսկ տարածքի վարձակալության, էլեկտրաէներգիայի, լրացուցիչ ներկանյութերի և այլ ծախսերը մենք հոգում ենք նվիրատվությունների, ինչպես նաև մեծահասակների համար անցկացվող վարպետության դասերի, և, անշուշտ, մեր ձեռնարկած գործի նկատմամբ ունեցած մեծ հավատի շնորհիվ»:

3 ամիս տևած դրամահավաքն ավարտվեց. Մուղդուսյան կենտրոնը հավաքեց բրուտանիվի համար անհրաժեշտ գումարը

Գրեթե ցանկացած մարդ, ով Blogger հարթակում իր կայքը, կամ բլոգն է ստեղծում` վաղ թե ուշ մի հարցի առաջ է կանգնում` ի՞նչպես բլոգերում ավելացնել ֆեյսբուքյան մեկնաբանություններն ու «լայքի» և «շեյրի» կոճակները:
Այսօր ձեզ կսովորեցնենք, թե ինչպես բլոգում տեղադրել ֆեյսբուքյան մեկնաբանություններն ու «լայքի», «շեյրի» կոճակները:
Նախքան այս գործողություններն անելը` խորհուրդ է տրվում կրկնօրինակել բլոգը:

Քայլ 1
Մուտք են գործում Blogger-ի կառավարման էջ և կատարում ենք այս քայլերը՝ Design > Edit Html կամ (Шаблон › Изменить HTML>
Քայլ 2 բացված ծրագրային կոդի դաշտում, սեղմում ենք քնթռոլ Էֆ (Ctrl+ F) կոճակները, որից հետո, պատուհանի աջ վերևի անկյունում հայտնվում է որոնումների պատուհանը:
Serach: մուտքագրում և փնտրում ենք  <data:post.body/> կոդը:

Քայլ 3 գտնված <data:post.body/> կոդի ներքևի տողում բացատ ենք ավելացնում` համոզվելով, որ ոչ մի այլ բան չեն ջնջում դրանով և ոչ էլ բացատի և <data:post.body/>-ի վեջտեղում ինչ-որ կոդի մասնիկներ են մնում...: Ուշադիր եղեք` որպեսզի այլ ծրագրային կոդերի վնաս չհասցնեք:
 և գտնելուց հետո, նրանից հետո տեղադրում ենք 
ներքևում գրված կոդը:

Քայլ 4 Բացատն ավելացնելուց հետո, կրկնօրինակում ենք լուսանկարի տակ տեղադրված կոդն ու տեղադրում <data:post.body/>-ի տակ, ինչից հետո` սեղմում ենք «Сохранить шаблон»  անուն ունեցող և կոդերի խմբագրման պատուհանի ձախ վերևի անկյունում գտնվող, նարնջագույն կոճակը:

Պատկերը մեծացնելու համար` սեղմեք նկարի վրա:

<!-- Facebook comments BEGIN --> 
<div id='fb-root'/> <script>(function(d, s, id) { var js, fjs = d.getElementsByTagName(s)[0]; if (d.getElementById(id)) {return;} js = d.createElement(s); js.id = id; js.src = &quot;//connect.facebook.net/en_US/all.js#xfbml=1&quot;; fjs.parentNode.insertBefore(js, fjs); }(document, &#39;script&#39;, &#39;facebook-jssdk&#39;));</script> <div class='fb-like' data-send='true' data-show-faces='true' data-width='500'/> <div class='fb-comments' data-num-posts='10' data-width='690' expr:data-href='data:post.url'/> 
<!-- Facebook comments END -->

Հայկ Կիսեբլյան

Ի՞նչպես ավելացնել Ֆեյսբուքյան մեկնաբանությունների հնարավորությունը Blogger հարթակում

Հոկտեմբերի 30-ի երեկոյան Երևանի Ավետիք Իսահակյանի Անվան կենտրոնական գրադարանի սրահում տեղի ունեցավ բանաստեղծուհի Տաթև Ոսկանյանի ստեղծագործությունների անդրանիկ գրքի շնորհանդեսը:
Հանդիսությունը մեկնարկեց գրքի ընթերցանությամբ, որից հետո խոսքը տրվեց Տաթևի ընտանիքի անդամներին, բանաստեղծ ընկերներին և նրա պոեզիայի սիրահար հանդիսատեսին:
Պատվավոր հանդիսականների շարքում էր նաև անվանի գրականագետ, Երևանի գրողների միության նախագահ Աբգար Ափինյանը, ով իր խոսքով ողջունեց երիտասարդ բանաստեղծուհու գործունեությունը:

«Վատ է այն, որ ես գրքում չնկատեցի խմբագրի անունը: Չնկատեցի, քանզի գիրքը չի խմբագրվել, որի պատճառով էլ գրքում կան մի քանի սրբագրական սխալներ: Սակայն գրքում կա մի մեծ ձեռքբերում», - նկատեց պարոն Ափինյանը` ընդգծելով, որ թեև գրքում կան սկսնակ գրողին բնորաշ բացթողումներ, բաց կա նաև կարևոր մի բան` այն, որ Տաթև Ոսկանյանը չունենալով պոեզիայի ոլորտում մեծ փորձ և հմտություններ, սակայն վստահելով իր ստեղծած արվեստի ուժին և Աստվածային նախախնամությանը` կարողացել է ստեղծել և իր փոքրիկ գրքում զետեղել, այնպիսի բանաստեղծություններ, որոնք կարելի է դնել հայ մեծերի բանաստեղծությունների կողքին:


Նյութը և ֆոտոշարքը` Հայկ Կիսեբլյանի

Երևանում կայացավ բանաստեղծուհի Տաթև Ոսկանյանի անդրանիկ գրքի շնորհանդեսը

Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ և Մայր Աթոռ Սուրբ Էջմիածնի Արխիվի և թանգարանների տնօրեն Արժանապատիվ Տ. Ասողիկ քահանա Կարապետյանի նախաձեռնությամբ լույս է ընծայվել «Մյուռոնօրհնությունը ԺԹ.-ԻԱ. դարերում» փաստաթղթերի և նյութերի ժողովածուն:

Մայր Աթոռ Սուրբ Էջմիածնի Արխիվի և Հայաստանի Ազգային արխիվի համատեղ ջանքերով հրատարակված վավերագրերը լուսաբանում են 19-21-րդ դարերում Մյուռոնօրհնության և Մյուռոնի առաքման գրեթեբոլոր առանցքային հարցերը: Ժողովածուի մեջ ընգրկվել են նաև 2001 և 2008 թթ. մյուռոնօրհնությունների վերաբերյալ նյութեր, ինչպեսև պատմական լուսանկարներ ու չհրատարակված նյութերի ցանկեր: Ժողովածուն կազմել և ծանոթագրել է Հայաստանի ազգային արխիվի աշխատակից պատմ. գիտ. թեկնածու Գոհար Ավագյանը:


Գիրքը տպագրվել է ամերիկաբնակ տեր և տիկին Տիրան և Քնար Եղբայրյանների մեկենասությամբ:

Մյուռոնօրհնությունը ԺԹ.-ԻԱ. դարերում. Նոր հրատարակություն

«Ղարաբաղյան պատերազմի վետերանների միություն» ՀԿ երիտասարդական թևի նախագահ Սևակ Եփրեմյանը սպասում է հրամանի՝ դիրքեր մեկնելու և զենք վերցնելու:

Henaran.am-ի թղթակցի հետ զրույցում Եփրեմյանը ասաց. «Ես երգիչ եմ: Երգում եմ ժողովրդական երգեր, ես հայր եմ դարձել բոլորովին վերջերս ու զենք կվերցնեմ հանուն իմ աղջկա ու մնացած բոլոր հայ երեխաների ապագայի: Եթե պատերազմ լինի՝ ես կգնամ երգելով»:
Սևակ Եփրեմյանի երգին միացավ նաև հրամանատար Յուրի Միքայելյանը. «Զենքով լինի, խաչով լինի պիտի գնանք վաղ թե ուշ…»:





Դիտեք տեսանյութը:

Երգիչ Սևակ Եփրեմյանը սպասում է դիրքեր մեկնելու և զենք վերցնելու հրամանի

Սեպտեմբերի 29-ին, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ, Օշականի Ս. Մեսրոպ Մաշտոց եկեղեցում տեղի ունեցավ Հայ Եկեղեցու մասնավոր վարդապետության չորս աստիճանների տվչության արարողություն:
Ձեռամբ Ռուսաստանի և Նոր Նախիջևանի հայոց թեմի առաջնորդ Գերաշնորհ Տ. Եզրաս արքեպիսկոպոս Ներսիսյանի մասնավոր վարդապետության իշխանություն տրվեց օրեր առաջ` սեպտեմբերի 25-ին վարդապետական թեզերը պաշտպանած Մայր Աթոռ Ս. Էջմիածնի յոթ միաբանների` Քրեակատարողական հիմնարկների հոգևոր տեսուչ Հոգեշնորհ Տ. Ռուբեն աբեղա Զարգարյանին, Գեղարքունիքի թեմի առաջնորդական տեղապահ Հոգեշնորհ Տ. Կիրակոս աբեղա Դավթյանին, Մայր Աթոռի փոխդիվանապետ Հոգեշնորհ Տ. Պարթև աբեղա Բարսեղյանին, Մայր Աթոռի Կադրերի բաժնի տնօրեն Հոգեշնորհ Տ. Կյուրեղ աբեղա Դավթյանին, Հունաստանի հայոց թեմի առաջնորդական տեղապահ Հոգեշնորհ Տ. Խորեն աբեղա Առաքելյանին, Մայր Աթոռի Գևորգյան հոգևոր ճեմարանի տեսուչ Հոգեշնորհ Տ. Գարեգին աբեղա Համբարձումյանին և Հառիճավանքի Թրբանճյան ընծայարանի տեսուչ Հոգեշնորհ Տ. Նշան աբեղա Հմայակյանին:

Արարողության ավարտին Գերաշնորհ Տ. Եզրաս արքեպիսկոպոս Ներսիսյանը շնորհավորեց նորընծա վարդապետներին` մասնավորապես նշելով. «Դուք այսօր կոչված եք Տիրոջ կենարար խոսքը քարոզելու, մեր սրբազան հայրերի ճշմարիտ վարդապետությունը մեկնելու, որպեսզի աստվածային խոսքի իմաստությամբ և ճշմարտությամբ առաջնորդվեն Սուրբ Եկեղեցու ձեզ վստահված մեր զավակները, որպեսզի ձեր խորհրդով ու ձեր իմաստուն առաջնորդությամբ մերժեն ամեն տեսակի գայթակղություն և մեղք, պահեն իրենց հոգու անդորրը»: Սրբազան Հայրը մաղթեց, որ Աստծու օրհնությունն ու Սուրբ Հոգու շնորհները մշտապես ուղեկցեն նրանց, հաստատուն մնան իրենց կոչման մեջ և վարդապետական գավազանով դեպի Տիրոջ կենարար խոսքն առաջնորդեն իրենց հավատացյալ հոտը: 
Նույն օրը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսն ընդունեց յոթ վարդապետներին` ուղեկցությամբ Մայր Աթոռ Սուրբ Էջմիածնի լուսարարապետ Գերաշնորհ Տ. Հովնան եպիսկոպոս Հակոբյանի և Վարդապետական թեզերի պաշտպանության հանձնաժողովի նախագահ, Մայր Աթոռի եկեղեցական հայեցակարգային գրասենյակի տնօրեն և Տավուշի թեմի առաջնորդ Գերաշնորհ Տ. Բագրատ եպիսկոպոս Գալստանյանի:
Հանդիպմանը Բագրատ Սրբազանը հանուն յոթ վարդապետների իր հավատարմությունը հայտնեց Ամենայն Հայոց Հայրապետին և Մայր Աթոռ Ս. Էջմիածնին: 
Այնուհետև վարդապետական աստիճանի արժանացած Հայր Սուրբերին շնորհավորեց և իր պատգամն ու գնահատանքը բերեց Վեհափառ Հայրապետը` վստահություն հայտնելով, որ նրանք ամենայն պատասխանատվությամբ կիրականացնեն իրենց ծառայությունը Հայ Եկեղեցու անդաստանում: Նորին Սրբությունը հորդորեց, որ իրենց ծառայությունն արդյունավորեն նաև գիտակրթական ասպարեզում:
Վերջում Հայոց Հայրապետը «Պահպանիչ» աղոթքով օրհնեց վարդապետներին և հաջողություն մաղթեց նրանց առաքելությանը:

Մասնավոր վարդապետության աստիճանի տվչություն Օշականի Ս. Մեսրոպ Մաշտոց եկեղեցում

Սեպտեմբերի 28-ին, ի հիշատակ Հայոց Ցեղասպանության սուրբ նահատակների,ձեռամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, օծվեցին Մայր Աթոռ Սուրբ Էջմիածնի հովանու ներքո օրեր առաջ կանգնեցված Դերջանի Ապարանից Ս. Դավիթ վանքի խաչքարերի նմանօրինակները: 
Երկու խաչքարերը կանգնեցվել են Նորին Սրբության օրհնությամբ ու նախաձեռնությամբ և ազնիվ բարերարությամբ տեր և տիկին Հակոբ և Դոննա Տիտիզյանների:
Խաչքարերի օծման հանդիսավոր արարողությունից առաջ խոսք ասաց Մայր Աթոռի Վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը: 

Մուշեղ Սրբազանը, դիմելով ներկաներին, մասնավորաբար նշեց, որ օրը շատ հատկանշական ու խորհրդավոր է: Անդրադառնալով հայ ժողովրդի համար նվիրական 2015 թ.-ին` նա ընդգծեց, որ Հայոց Ցեղասպանության նահատակների սրբադասումով տարին արժևորվեց հայ ժողովրդի համար, իսկ այս կապակցությամբ Մայր Աթոռում վեր խոյացած զույգ խաչքարերի օծումն առիթ է, որպեսզի նահատակության քաղցր լուծը ճաշակած սրբերի համար աղոթք և հայց ուղղվի երկինք: Սրբազանը հավելեց նաև, որ մեծագույն երջանկություն է տեսնել` ինչպես են ամենքը միասնաբար համատեղված սրբություն խորհրդանշող խաչքարերի օծման աստվածային իրողության առջև: 
Իր խոսքում Մուշեղ եպիսկոպոսը կարևոր ձեռքբերում համարեց այն, որ Ամենայն Հայոց Կաթողիկոսի ձեռամբ պետք է Հաղթության Սրբալույս Մյուռոնով առաջին անգամ օծվեն իրենց վիթխարի չափսերով և հոգևոր իմաստով այս երկու պանծալի խաչքարերը: «Այս երկու խաչքարերը կանգնեցվել են այն հազարավոր խաչքարերի փոխարեն, որոնք այլևս չկան և այն բազմաթիվ հայորդիների փոխարեն, ովքեր ծնկել են այդ խաչքարերի առջև և աղոթքներ վերառաքել Բարձրյալին», - շեշտեց Սրբազան Հայրը:
Այնուհետև խոսքով ներկաներին դիմեց բարերար Հակոբ Տիտիզյանը: Նա վերհիշեց այն ուղին, որով անցել են այս երկու խաչքարերը: Տիար Տիտիզյանը երախտագետ սրտով շնորհակալություն հայտնեց նաև քանդակագործներին, ճարտարապետներին, որոնք շուրջ ինն ամիսներ տքնեցին, որպեսզի ստեղծվեին այս սրբությունները: Նա նաև վստահություն հայտնեց, որ խաչքարերի տեղադրումը պետք է գալիք սերունդներին պատմի հայ ժողովրդի փառավոր մշակույթի, Հայոց Ցեղասպանության սուրբ նահատակների անմահ հիշատակի և հայոց ներկա վերածննդի մասին:

Խոսքից հետո տեր և տիկին Տիտիզյանների կողմից քողազերծվեցին երկնասլաց խաչքարերը: Ապա կատարվեց խաչքարերի օրհնության արարողությունը, որի ընթացքում Ամենայն Հայոց Կաթողիկոսն օծեց իրենց կերտվածքով եզակի խաչքարերը:
Արարողության ավարտին տեղի ունեցավ նաև ընդունելություն, որի ժամանակ Նորին Սրբություն Գարեգին Բ Ամենայն Հայոց Կաթողիկոսը վերստին իր օրհնությունը բերեց Տիտիզյան ընտանիքի անդամներին: 
Ամենայն Հայոց Հայրապետը տեր և տիկին Հակոբ և Դոննա Տիտիզյաններին, ինչպես նաև տեր և տիկին Քրիս Տիտիզյաններին եկեղեցանվեր գործունեության համար Հայաստանյայց Առաքելական Ս. Եկեղեցու «Ս. Գրիգոր Լուսավորիչ» պատվո բարձրագույն շքանշան շնորհեց:

Մայր Աթոռում օծվեցին Դերջանի Ապարանից Ս. Դավիթ վանքի խաչքարերի նմանօրինակները

«Նկարում` Բեյրութի հայկական ինքնապաշտպանական «Մեծ Արաբո» ջոկատն է 1977-ին: Լիբանանի քաղաքացիական պատերազմի ընթացքում, 1970-ականների երկրորդ կեսին, սփյուռքում հայերի մեծ համախմբում տեղի ունեցավ` ամենուրեք հայրենասիրական մեծ վերելք էր: Բեյրութ էին ժամանում հայ կամավորականներ տարբեր երկրներից` պաշտպանելու հայկական թաղամասերը, որոնք պատերազմի ժամանակ հարձակումների թիրախ էին դարձել մուսուլմանական զինյալ խմբավորումների կողմից: 
Հիշում եմ, անգամ մենք, հայաստանցի ուսանողներս, մեր զուտ խորհդանշական լուման ներդրեցինք այդ գործընթացում: 1978-ի գարնանը Երևանի համալսարանում ստեղծվել էր ուսանողական նախաձեռնող խումբ, որը կամավորներ էր գրանցում` անհրաժեշտության դեպքում Բեյրութ մեկնելու համար: Պարզ է, որ այդպես էլ ամեն ինչ մնաց թղթի վրա. տոտալիտար երկրի պայմաններում, ինչպիսին Խորհրդային Միությունն էր` այլ կերպ հնարավոր չէր: Բայց կարևորը, ինչպես ասում են` այդ փաստի առկայությունն էր: 

1965-ի ազգային զարթոնքից հետո` սա հայերի համախմբման թերևս առաջին դեպքը եղավ, իսկ Բուրջ-Համուդ հայկական թաղամասի մոտ մղած հաղթական մարտերը` դասվեցին հայ ազատագրական պայքարի փայլուն էջերի շարքին: Ահա թե ինչ է գրում ամերիկացի անվանի պատմաբան Ջոն Բուլոքը իր «Երկրի կործանումը» գրքում. «Հայերի աննախադեպ քաջությունը մեծ տպավորություն թողեց Լիբանանի ողջ քրիստոնյա համայնքի վրա: Քաղաքացիական պատերազմի ընթացքում հայերը բազում անգամ կարողացան ջախջախել հակառակորդի ջոկատները, որոնք 3-4 անգամ գերազանցում էին իրենց թվաքանակով»:

Հայերի ինքնապաշտպանական մարտերը Բեյրութում...

Սեպտեմբերի 28-ին Մայր Աթոռ Սուրբ Էջմիածնում, հանդիսապետությամբ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի, տեղի ունեցավ նորակառույց «Գարեգին Ա» կրթական կենտրոնի բացումը: 
Արարողությանը ներկա էին կենտրոնի բարերարներ տեր և տիկին Հայկ և Էլզա Տիտիզյանները, Տիտիզյան ընտանիքի անդամներ, ՀՀ վարչապետ Հովիկ Աբրահամյանը, թեմակալ առաջնորդներ, Մայր Աթոռի բարերարներ և այլ հյուրեր:
Այս առիթով, մինչև կենտրոնի բացումը, երջանկահիշատակ Գարեգին Ա Ամենայն Հայոց Կաթողիկոսի շիրիմի առջև կատարվեց հոգեհանգստյան կարգ:
«Գարեգին Ա» կրթական կենտրոնի առջև հյուրերին ողջունեց Մայր Աթոռի հոգևոր-կրթական հաստատությունների վերատեուչ Գերաշնորհ Տ. Գևորգ եպիսկոպոս Սարոյանը, ով «Գարեգին Ա» կենտրոնի ստեղծումը վերջին տասնամյակում Մայր Աթոռի կրթական գործունեության ոլորտում գրանցված լավագույն ձեռքբերումներից մեկը դիտարկեց: 
«Այս կենտրոնի ստեղծումը դարձյալ վկայում է, որ Մայր Աթոռը սրբորեն պահում է սեփական առաքելությանը բնորոշ ավանդույթները, որն իր դարավոր գոյության ընթացքում հավատն ու գիտությունը երբեք իրար հակառակ չի դիտել, այլ միմյանց փոխլրացնող, ամբողջացնող: Վեհափառ Տեր, Ձեր հովվապետության ընթացքում այն գաղափարն արմատավորեցիք , որ Հայոց Եկեղեցու բարեկարգումը հնարավոր է միայն հոգևոր կրթությունը համապատասխան որակի բարձրացնելու պայմանով: Այս լույսի ներքո սույն կենտրոնի հիմնումը նաև գնահատանքի և հարգանքի տուրք է Ձեր նախորդի՝ Գարեգին Ա Կաթողիկոսի հիշատակին. մարդու, ում մտապատկերում հոգևորականն ու գիտնականը նույն նպատակին են ծառայում», - նշեց Սրբազանը:
Այնուհետև Վեհափառ Հայրապետը և բարերաներ Հայկ և Էլզա Տիտիզյանները կտրեցին «Գարեգին Ա» կրթական կենտրոնի մուտքի ժապավենը, որով պաշտոնապես ազդարարվեց կենտրոնի բացումը: 
Կրթական կենտրոնի դահլիճում արարողության մասնակիցները դիտեցին Գարեգին Ա Հայրապետին նվիրված ֆիլմը, ապա, հանդիսապետությամբ Ամենայն Հայոց Հայրապետի, կատարվեց նորաբաց կենտրոնի օրհնության կարգը: 
Արարողության ավարտին Նորին Սրբությունն իր օրհնությունն ու պատգամը փոխանցեց ներկաներին:

«Ուրախությամբ և սիրով ողջունում ենք ամենքիդ ներկայությունը հայոց հոգևոր կենտրոնում` Մայր Աթոռ Սուրբ Էջմիածնում: Հիրավի, պատմական օրեր ենք ապրում Լուսավորչահիմն Մայր Աթոռում: Երեկ Ամենախնամ Տիրոջ բարեսեր կամքով կատարեցինք Սրբալույս Մյուռոնի օրհնության արարողությունը, և տակավին թարմ են հոգեպարար այն զգացումները, որ համակել էին ամենքիս սրտերը: Այսօր ևս տոնական նույն ոգին է թևածում Մայր Աթոռում. առիթը Մեր սիրելի բարերարներ տեր և տիկին Հայկ և Էլզա Տիտիզյանների ազնիվ հանձնառությամբ կյանքի կոչվող «Գարեգին Ա» կրթական կենտրոնի կառույցն է, որի շինարարական աշխատանքները, կամոքն Աստուծո, իրենց բարեհաջող ավարտին պիտի հասնեն առաջիկային: Փառք ու բարեբանություն Երկնավոր Տիրոջը, որ աստվածասեր մեր ժողովրդին պարգևել է ազնվասիրտ բարերար զավակներ, ովքեր իրենց եռանդն ու կարողությունները սիրահոժար կերպով ծառայեցնում են ի բարօրություն մեր Հայրենքի և ի պայծառություն Առաքելական Մեր Սուրբ Եկեղեցու:
Երջանկահիշատակ Գարեգին Ա Հայրապետի անունը կրող այս կենտրոնը մեր Եկեղեցու հոգևոր-կրթական ասպարեզում կարևոր առաքելություն է ստանձնելու: Կենտրոնի հարկից ներս իրենց գիտելիքները պիտի հարստացնեն և կատարելագործեն մեր Եկեղեցու հոգևոր սպասավորները, ուսուցիչներն ու կրթության ոլորտի այլ ներկայացուցիչներ: Կրթական կենտրոնում նպաստավոր պայմաններ են ստեղծվում նաև հայագիտական ու աստվածաբանական հարցերի շուրջ գիտաժողովներ կազմակերպելու համար:
Դարեր շարունակ հայ հոգևորականն ու հայ ուսուցիչն են կրթել մեր ժողովրդին կերտել հոգևոր-բարոյական նկարագիրը, որով ազգս ապրել է, ստեղծել հարուստ դպրություն ու մշակույթ, հաղթահարել փորձություններ և հավատով նայել գալիքին։ Հոգելույս Գարեգին Ա Հայրապետն էլ՝ իբրև հոգևորական և ուսուցիչ, իր գրական և աստվածաբանական ծավալուն ժառանգության մեջ մշտապես եղավ մեր հավատքի, մեր լեզվի, մշակույթի, մեր հայրենիքի ջատագովն ու պաշտպանը:
«Գարեգին Ա» կրթական կենտրոնը մշտավառ է պահելու հիշատակը լուսահոգի Հայրապետի, նրա անձը և կյանքի անցած ուղին օրինակ ու խրախույս դարձնելով և ոգեշնչելով ու նոր լիցքեր հաղորդելով երիտասարդ հոգևորականներին և ուսուցիչներին:
Սիրելի Հայկ և Էլզա, կրթական այս կենտրոնի կառուցման աստվածահաճո նախաձեռնությունն իր մեջ խտացնում է հոգելույս Հայրապետի հանդեպ ունեցած Ձեր ազնիվ ու ջերմ զգացումները, Ձեր մեծ սերն ու նվիրումը: Հիրավի, այդ բացառիկ զգացումների արգասիքն ու վկայություններն են Գարեգին Ա Հայրապետի հիշատակը հավերժացնող արժանավոր Ձեր գործերը: Երանաշնորհ Հայրապետի սրտում փայփայած ու կյանքի վերջին օրերին ձեզ փոխանցած տեսլական իղձն է հայագիտության ու աստվածաբանության կենտրոնի կառուցումը, որն այսօր իրական դարձած` նպաստ է բերելու մեր ժողովրդի հոգևոր, գիտակրթական ու մշակութային կյանքի առաջընթացին: Երջանկահիշատակ Հայոց Հայրապետի հանդեպ տածած Ձեր խորին հարգանքի և նրա լուսավոր հիշատակի առջև խոնարհումի դրսևորումն է նաև նրա գրական ժառանգության և անտիպ էջերի հրատարակության նախաձեռնությունը, որ տակավին շարունակում եք՝ նոր կյանք ու նոր շունչ տալով Գարեգին Ա Հայրապետի հոգեմտավոր ճառագայթումներին: Այս պահին, սիրելի բարերարներ, հոգելույս Հայրապետը երկնքից օրհնում է Ձեզ և Ձեր աստվածահաճո բարի իրագործումները», - ասաց Հայոց Հայրապետը:
Նորին Սրբությունը վերստին իր բարձր գնահատանքը բերեց Տիտիզյան ընտանիքին` մաղթելով նորանոր ձեռքբերումներ և ազգասեր ու եկեղեցաշեն գործոց հաջողություններ:
Վեհափառ Հայրապետը նաև իր օրհնությունը բերեց կառույցի ճարտարապետներ Արտավազդ Նազարեթյանին ու Արամ Սահակյանին և շինարար Ստեփան Ախոյանին:
Վերջում Գարեգին Բ Հայրապետը մաղթեց, որ Գարեգին Ա լուսահոգի Հայրապետի սերմանած հունդերը շարունակեն նոր ծիլեր արձակել և առատ, բարի պտուղներ պարգևեն մեր ժողովրդին, և օրհնյալ ճանապարհ ցանկացավ «Գարեգին Ա» կրթական կենտրոնի առաքելությանը:

Մայր Աթոռ Ս. Էջմիածնում բացվեց «Գարեգին Ա» կրթական կենտրոնը

Հոկտեմբերի 23-ին, ժամը 13:00-ին Նարեկացի Արվեստի Միությունում տեղի կունենա բացառիկ վարպետաց դաս հանրահայտ դաշնակահար, ՀՀ մշակույթի նախարարության ոսկե մեդալակիր, ՀՀ վաստակավոր արտիստ Արմեն Բաբախանյանի հետ:

Աշխարհի լավագույն բեմերում և սիմֆոնիկ նվագախմբերի հետ հանդես գալուց և միջազգային մրցույթների ժյուրիի անդամ լինելուց բացի, Արմեն Բաբախանյանը բազմաթիվ վարպետաց դասեր է ունեցել աշխարհով մեկ՝ Ռուսաստանում, Միացյալ Թագավորությունում, Իսպանիայում, Ճապոնիայում, Չինաստանում, Իսլանդիայում և ԱՄՆ-ում: 
Նարեկացի Արվեստի Միությունը հայ դաշնակահարներին եզակի հնարավորություն է ընձեռում շփվելու վարպետի հետ, ծանոթանալու նրա կատարողական հմտություններին և ստանալու մասնագիտական արժեքավոր խորհուրդներ:

Վարպետաց դասին մասնակցել ցանկացողները կարող են ներկայանալ առանց տարիքային սահմանափակման՝ պատրաստած ունենալով առնվազն 2, ոճով իրարից տարբերվող ստեղծագործություններ: Անհրաժեշտ է մինչև հոկտեմբերի 20-ը տեսագրությունն ուղարկել eka@naregatsi.org էլեկտրոնային հասցեին կամ անձամբ ներկայացնել Նարեկացի Արվեստի Միություն, Վարդանանց 16/1 հասցեով:

Բաց մի թողեք մասնագիտական ինքնազարգացման այս եզակի հնարավորությունը:

Մուտքն ազատ է:
Հեռ. +374 11 201020

23 Վարպետաց դաս Մաեստրո Արմեն Բաբախանյանի հետ

Հոկտեմբերի 6-ին, ժամը 19:00-ին Նարեկացի Արվեստի Միությունում տեղի կունենա Կոմիտասի անվան Երևանի Պետական Կոնսերվատորիայի երկրորդ կուրսի ուսանող Տիգրան Դավթյանի դուդուկի մենահամերգը: Դասատու՝ Էմանուել Հովհաննիսյան:

Համերգի ընթացքում ունկնդիրը կվայելի հայկական ժողովրդական և հոգևոր երաժշտություն ջութակի, թավջութակի նվագակցությամբ: Երեկոն իր կատարումներով կծաղկեցնի նաև Նարեկացի Համույթը: 
Կհնչեն Գրիգոր Նարեկացու, Կոմիտասի, Սայաթ-Նովայի, Խաչատուր Ավետիսյանի, Ռոմանոս Մելիքյանի և Ծովինար Հովհաննիսյանի ստեղծագործությունները: 

Սիրով սպասում ենք բոլորին:

Մուտքն ազատ է:
Հեռ. +374 11 201020 

Դուդուկի մենահամերգ. Տիգրան Դավթյան

Հոկտեմբերի 16-ին, ժամը 19:00-ին Նարեկացի Արվեստի Միությունը սիրով հյուրընկալելու է Հայաստանում շատ սիրված և ժամանակին մեծ տարածում ունեցող ակորդեոնի բոլոր հայտնի վարպետներին: 

Համերգի ներկաները ոչ միայն կծանոթանան ակորդեոնի պատմությանը, այլև կբացահայտեն այս յուրահատուկ գործիքի լայն հնարավորությունները: Ակորդեոնահարների տարբեր սերունդներ իրենց անսպասելի կատարումներով կփորձեն կոտրել Հայաստանում կարծրացած կարծիքը այս հանրահայտ գործիքի մասին:

Համերգին կհնչեն ինչպես հայկական, գնչուական, ջազային՝ այնպես էլ դասական ստեղծագործություններ՝ Բախ, Բրամս, Վիվալդի:

Սիրով սպասում ենք բոլորին:

Մուտքն ազատ է:
Հեռ. +374 11 201020 

‹‹Վերադարձ›› Ակորդեոնի վարպետները Նարեկացի Արվեստի Միությունում

Հոկտեմբերի 25-ին, ժամը 19:00-ին Նարեկացի Արվեստի Միությունը սիրով հրավիրում է իր հետևորդներին Կոմիտասի անվան Կամերային երաժշտության տուն, որտեղ կկայանա մոսկվայաբնակ 11-ամյա դաշնակահարուհի, միջազգային փառատոների բազմակի դափնեկիր Եվա Գևորգյանի մենահամերգը:

Ապրելով և սովորելով Հայաստանից դուրս՝ Եվայի առաջին մեծ մենահամերգը, որը տեղի կունենա հայրենիքում իր խոստումնալից ապագայի առաջին կարևոր քայլը կլինի: Չնայած իր մանկահասակ լինելուն նա ունակ է ունկնդրին գոհացնելու իր հասուն երաժիշտին վայել կատարողական տեխնիկայով և երգացանկով:
Համերգին Եվայի կատարմամբ կհնչեն Բախի, Բեթհովենի, Շոպենի, Լիստի, Չայկովսկու, Ռախմանինովի ստեղծագործությունները:

Եվան սովորում է Մոսկվայի Պ.Չայկովսկու անվան պետական կոնսերվատորիային կից երաժշտական դպրոցում: Նա նվագում է 3 տարեկանից, մասնակցել է 15-ից ավելի միջազգային մրցույթների և փառատոների` մասնավորապես «Շոպեն» դաշնակահարների մանկապատանեկան միջազգային մրցույթին (Լեհաստան), «Չիտա դի Սան-Դոնա-դի-Պյավե» II միջազգային մրցույթին (Իտալիա), Բակուլովի անվան դաշնակահարների համառուսաստանյան մրցույթին (Եկատերինբուրգ), Clavi Cologne Piano Competition (Գերմանիա) և արժանացել բացառապես առաջին մրցանակների: 

Բաց մի թողեք այս անմոռանալի համերգը և տաղանդավոր փոքրիկ հայուհուն ճանաչելու առիթը: 

Մուտքն ազատ է:
Հեռ. +374 11 201020

Մենահամերգ. ԵՎԱ ԳԵՎՈՐԳՅԱՆ (Մոսկվա)

Այսօր` սեպտեմբերի 26-ին, երբ որոշ հայեր վայնասուն են բարձրացել և հայտնվել սթրեսային իրավիճաակի մեջ, հայ-ադրբեջանական սահմանին պատահած միջադեպերի պատճառով, Երևանի Անգլիական այգում անց է կացվում Գյուղական կյանքի և ավանդույթների 2-րդ փառատոնը: Փառատոնի շրջանակներում իրենց գյուղմթերքով հանդես եկավ նաև Տավուշ աշխարհի սահմանամերձ գոտում գտնվող, համանապահ Բարեկամավան գյուղը, որը գրեթե ամեն օր հայտնվում է ադրբեջանական պետութան գնդագոծության ներքո: 
Փառատոնի ընթացքում իր ակտիվությամբ աչքի ընկավ նաև Տավուշի սահմանամերձ Բերդ քաղաքի տաղավարը:

Փառատոնին մասնակցեցին նաև ՀՀ մյուս մարզերից ժամանած ֆերմերային խմբերը, գյուղատնտեսության ոլորտի ձեռներեցները, նորորարություններ ներմուծող փորձագետները, գյուղմթերք արտադրողներին աջակցող հասարակական կազմակերպությունները, ինչպես նաև գյուղատնտեսության ոլորտում հաջողություն գրանցած կանանց խմբերը: Մանսակիցները ներկայացրեցին իրենց արտադրանքները, գյուղատնտեսական մթերքները, հողագործության տեխնոլոգիաներն ու ձեռագործ աշխատանքները:

Գյուղական կյանքի և ավանդույթների 2-րդ փառատոնը անցկացվում է ՀՀ գյուղատնտեսության նախարարության, Երևանի քաղաքապետարանի աջակցությամբ և Եվրամիության կողմից ֆինանսավորվող «Եվրոպական հարևանության գյուղատնտեսության և գյուղական համայնքների զարգացման ծրագրի» շրջանակում:




Նյութը և ֆոտոշարքը` Հայկ Կիսեբլյանի

Երևանում մեծ շուքով կայացավ Գյուղական կյանքի և ավանդույթների 2-րդ փառատոնը. ֆոտոշարք